其實除咗愛，了解自己都係一個學一世都學唔完嘅課題。
我記得大學時候同三個朋友去羅馬旅行，某朝食完個cereal milk早餐，我突然之間肚瀉，跑咗去搵廁所，喺個廁所門口我跪求等緊個鬼佬讓我先，我話我真係瀨喇，原來我要去到19歲先會知自己個胃係對奶係敏感。
又好似頭先去食車仔麵，我諗咗好耐揀咩麵，最後要咗幼麵，跟住我先知原來自己最憎幼麵，但係明明呢樣嘢已經出現咗係我生命裏面30年。
連咁直接嘅一食一屙都未搞清楚，更何況係究竟自己想做乜、究竟自己愛唔愛一個人、究竟呢個人適唔適合我，又好難怪啲人活一生都柒吓柒吓嘅。